Baadhi ya vilabu vikubwa vya Ligi kuu ya NBC Tanzania vimetaka mazungumzo ya kumrejesha GSM yafanyike kufuatia Mdhamini huyo mwenza kujiondoa
GSM ilijiondoa kama mdhamini mwenza kwa kile kilochodaiwa kuwa TFF ilishindwa kuheshimu baadhi ya masharti ya mkataba yaliyokibaliwa
Kufuatia hilo wadau wa soka wamekuwa na maoni tofauti huku wengi wakitaka mazungumzo ya haraka kati ya GSM na TFF kufanyika na kurekebisha kasoro zilizopo ili kuirejesha GSM katika nafasi yake.
Afisa habari wa Ruvu Shooting, Masau Bwire alibainisha kuwa kuondoka kwa GSM ni pigo kubwa kwa vilabu
"Waungane kutafuta suluhu kwani ligi inahitaji wadhamini wengi na sio kuwapoteza " alisema Bwire huku akikiri hawakuwa wameanza kupokea fedha kutoka GSM tangu mkataba huo usainiwe
Kwa upande mwingine Katibu wa Mbeya City Emmanuel Kimbe alisema ameshangazwa na kitendo cha GSM kujiondoa katika nafasi hiyo akiamini pande husika zitakaa kutafuta muafaka
"Ni kweli hatujapokea kiasi chochote kutoka kwao lakini hilo sio suala kubwa kwasababu tulijua muda wowote tungeweza kupata sehemu yetu kulingana na matakwa ya mkataba"
Aidha, Kimbe amesema changamoto nyingine inayovikabiki vilabu ni suala la nembo ya GSM kuwepo kwenye jezi za timu hizo, jambo ambalo litalazimisha kuingia gharama ya kutengeneza upya jezi zao kwa kuondoa nembo ya GSM.
Mwenyekiti wa Biashara United, Selemani Mataso kwa sehemu yake amesema wanasubiri kusikia TFF itakuja na tamko gani
"Kwa upande wetu hatuna mengi ya kusema kuhusu kujiengua kwa GSM bali tunataka kuona TFF itatoa maamuzi gani."
Mapema Mwenyekiti wa Bodi ya Ligi (TPLB), Stephen Mguto alipoulizwa kuhusu majibu aliirushia mpira TFF akisema wao ndio wapo katika nafasi nzuri ya kutolea maelekezo wakati TFF ikisisitiza bado inaliangalia suala hilo kabla ya kutoa tamko
Credit : Maulid Kitenge
