Jana wapo mashabiki wa Yanga ambao waliingia uwanja wa Benjamin Mkapa kushuhudia mchezo wa kombe la Shirikisho kati ya Simba dhidi ya Asec Mimosas
Wapo walioingia kwa lengo la kuwaunga mkono Asec Mimosas, ni kawaida shabiki kindakindaki wa Yanga haitakuwa rahisi kwake kwenda uwanjani kuishangilia Simba kutokana na historia na upinzani wa jadi uliopo baina ya timu hizo kongwe zaidi hapa Tanzania
Iko hivyo hata kwenye michezo ya Yanga utawakuta mashabiki wa Simba wengi tu wakishangilia timu pinzani
Zipo video zinaonyesha mashabiki wa Simba wakiwashambulia majukwaani mashabiki wa Yanga waliokuwa wamevaa jezi zao. Ni aibu kuona matukio ya aina hii yanaendelea viwanjani
Ukiwasikiliza viongozi wa Simba wanatamba kuwa mashabiki wao ni bora zaidi nchini kwa sababu ni waungwana, waliopevuka kiakili
Ubora huo ni ule wa kupiga wenzao bakora kwa sababu tu hawaungi mkono timu yao?
Mbaya zaidi wanapiga wenzao katika mchezo ambao camera za CAF zinachukua kila tukio
Kama CAF watachukulia tukio lile kwa 'userious' ni wazi Simba inaweza kuadhibiwa na hata kuzuiwa kuingiza mashabiki katika michezo yao
Zipo nyakati misimu kadhaa iliyopita mashabiki wa Yanga walituhumiwa na hata baadhi yao kufungiwa kwenda viwanjani kwa matukio ya aina hiyo
Naamini mamlaka zimeona tukio lile, wanapaswa kuchukua hatua kwani hii sio mara ya kwanza kwa mashabiki wa Simba kuwashambulia wenzao wa Yanga
Soka ni mchezo wa kiungwana, ipo siku yatatokea maafa kama tabia hii itaachwa iendelee kuota mizizi
