Kocha Mkuu wa Yanga, Nasreddine Nabi amesema malengo yake ni kuona timu yake inashinda mchezo ujao wa Ligi Kuu Tanzania Bara dhidi ya Mtibwa Sugar utakaochezwa Uwanja wa Manungu na kuweka rekodi ya kukamilisha mzunguko wa kwanza bila kupoteza
Yanga ipo kileleni mwa msimamo wa ligi ikiwa na pointi 36, baada ya kushuka uwanjani mara 14, ambapo imefanikiwa kushinda michezo 11 na kutoka sare mara tatu pekee dhidi ya Simba, Namungo na Mbeya City.
Nabi amesema ili kutimiza malengo yao msimu huu ambayo ni kutwaa ubingwa, wanapaswa kushinda kila mchezo unaokuja mbele yao.
Amesema jambo rahisi lakini litawezekana kama kila mmoja ndani ya kikosi atatimiza wajibu wake.
"Tuna ratiba nzuri ambayo inatupa nafasi ya kujipanga zaidi kwa mechi zilizosalia ingawa tutawakosa baadhi ya wachezaji kutokana na sababu mbalimbali ikiwamo majeraha na adhabu, lakini wachezaji waliobaki wanatosha kufanya kitu na kupata matokeo kwenye mechi hii, sisi benchi la ufundi tumeupa umuhimu mkubwa mchezo huu kuhakikisha tunashinda."
"Tunaenda kumkosa Dickson Job, sababu ya adhabu lakini pia tunaenda kuwakosa wachezaji zaidi ya watano, lakini nafurahi kurejea tena kwa Djuma Shaaban ambaye alikosa michezo mitatu iliyopita naamini ataongeza kitu kwenye mchezo ujao," alisema Nabi
Nabi amesisitiza kuwa haangalii uwezo wa timu ambazo anakwenda kukutana nazo bali anachokifanya ni kuhakikisha anawaandaa wachezaji wake kwa kuwajenga kimbinu na kisaikolojia ili waweze kupambana na kupata matokeo katika mechi za mashindano yote wanayoshiriki.
