Vinara wa ligi kuu ya NBC, Yanga Sc wako mkoani Morogoro ambapo jioni ya leo watashuka kunako dimba la Manungu kuikabili Mtibwa Sugar katika mchezo wa kukamilisha mzunguuko wa kwanza
Ni mchezo muhimu sana kwa Yanga kushinda ili kuendelea kujikita kileleni mwa msimamo wa ligi wanayoongoza kwa tofauti ya alama tano baada ya kujikusanyia alama 36 kutoka michezo 14
Hata hivyo hautakuwa mchezo mwepesi kwa Yanga hata kidogo, Mtibwa Sugar wamekuwa na mwenendo mzuri katika michezo waliyocheza katika uwanja wao wa Manungu ambao unachukua takribani mashabiki 2,500 tu
Mtibwa Sugar pia hawako katika nafasi nzuri kwenye msimamo wa ligi wakishika nafasi ya 15 wakiwa wamekusanya alama 12 kutoka michezo 14
Kocha Msaidizi wa Yanga Cedric Kaze amesema wanafahamu ugumu wa mchezo huo lakini hakuna mchezo mwepesi waliocheza msimu huu. Hivyo wachezaji wanapaswa kupambana ili kuzipata alama tatu, hazitakuja zenyewe
Habari njema kwa Yanga ni kurejea kwa baadhi ya wachezaji waliokuwa majeruhi
Salum Abubakar 'Sure Boy', Kibwana Shomari na Denis Nkane wako tayari kuelekea mchezo huo wakiungana na Djuma Shabani ambaye amerejea baada ya kumaliza adhabu ya kufungiwa michezo mitatu
Wachezaji watakaokosekana leo ni pamoja na Dickson Job anayetumikia adhabu ya kufungiwa mechi tatu, atakosa mchezo wa pili leo, Abdallah Shaibu 'Ninja', Yassin Mustafa, Chico Ushindi, David Bryson na Jesus Moloko nao watakosekana kwa sababu ni majeruhi
