Mwenyekiti wa Yanga Dk Mshindo Msolla amewataka wapenzi, wanachama na mashabiki wa Yanga kutobweteka kutokana na mafanikio waliyopata katika duru ya kwanza ligi kuu ya NBC
Yanga ilifunga vyema duru ya kwanza kwa ushindi wa mabao 2-0 dhidi ya Mtibwa Sugar na ikaanza duru ya pili kibabe kwa ushindi wa mabao 3-0 dhidi ya Kagera Sugar na kujikita kileleni mwa msimamo wa ligi kuu baada ya kufikisha alama 42
Yanga inaongoza ligi kwa tofauti ya alama 11 dhidi ya Simba inayoshika nafasi ya pili
Dk Msolla amesema kama ni mechi wamecheza kipindi cha kwanza wanaongoza hivyo wanapaswa kurejea katika kipindi cha pili kulinda matokeo waliyopata na kufunga mabao zaidi
Amesema benchi la ufundi na wachezaji wana kazi ya kufanya katika michezo 14 iliyobaki ili kuhakikisha wanatwaa ubingwa
"Nawataka benchi la ufundi na wachezaji wasibweteke kwa mafanikio haya. Wachezaji wanapaswa kupambana kuhakikisha tunafanikisha malengo yetu"
"Kwa mashabiki pia tusibweteke, tujitokeze kwa wingi viwanjani kuwaunga mkono. Uongozi tulionao sasa ni wa kipindi cha kwanza. Sasa tumeingia kwenye kupindi cha pili na tunapaswa kuhakikisha tunalinda matokeo hayo"
"Tunahitaji kushinda ubingwa msimu huu lakini safari bado, tuhakikishe tunafanya vizuri katika michezo 14 iliyobaki ambayo minne tutacheza nje ya jiji la Dar es salaam na 10 tutacheza hapa Dar es salaam," alisema Dk Msolla
