Mlinzi wa Yanga Abdallah Shaibu 'Ninja' ameushukuru uongozi wa Yanga chini ya udhamini wa GSM kwa kufanikisha matibabu ya jeraha lake la goti nchini Tunisia
Ninja alisafirishwa kwenda kutibiwa Tunisia akiongozana na Kibwana Shomari, matibabu yao yakigharimiwa na GSM kwa asilimia 100
Katika mahojiano maalum na Yanga TV, Ninja amesema alianza kusumbuliwa na maumivu ya goti msimu uliopita baada ya mchezo wa kombe la FA dhidi ya Tanzania Prisons ambao ulimalizika kwa Yanga kuibuka na ushindi wa bao 1-0
"Baada ya mchezo ule niliendelea kusikia maumivu na wakati mwingine sikuyasikia, lakini kadiri nilivyokuwa nikifanya mazoezi maumivu yaliongezeka"
"Ilifika wakati nikawa sifurahii tena kucheza mpira na hata mazoezini nikawa sijitumi sana kutokana na maumivu niliyokuwa nikisikia"
"Baadae nikawaambia viongozi wangu juu ya tatizo lililokuwa likinisumbua ndipo wakati ambao mwenzangu Kibwana nae alipata majeraha sote tukapelekwa Tunisia kutibiwa"
"Nawashukuru sana viongozi na wadhamini GSM kwa kufanikisha matibabu yangu. Ilifika wakati nilifikiri nisingeweza tena kucheza mpira, walichofanya kina thamani kubwa kwangu"
"Siwezi kusema ni gharama kiasi gani imetumika lakini ni gharama kubwa sana. Baada ya matibabu nilitakiwa kukaa nje kwa wiki tatu, sasa nimetimiza wiki nne na nimeanza mazoezi mepesi"
"Natarajia baada ya wiki mbili nitakuwa nimepona kabisa tayari kurejea tena uwanjani," alisema Ninja
