Mshambuliaji wa Yanga Heritier Makambo amesema anaamini muda wake wa kufunga mabao katika ligi kuu ya NBC umekaribia
Makambo bado hajafanikiwa kuzifumania nyavu kwenye ligi msimu huu licha ya kuwa amefunga mabao matatu katika michuano ya kombe la FA na kufunga mabao kadhaa katika michezo ya kirafiki
Moja ya changamoto zinazomkabili msimu huu ni kutopata muda mrefu wa kucheza katika kikosi cha kwanza mbele ya Fiston Mayele ambaye amekuwa na msimu bora zaidi
"Jambo muhimu kwangu ni kuisaidia timu kupata matokeo bila ya kujali kama nimefunga au la, nitaendelea kupambana kila ninapopewa nafasi, naamini nitafunga katika michezo inayokuja," alisema Makambo
Katika mchezo wa kirafiki dhidi ya Mafunzo Fc uliopigwa uwanja wa Azam Complex hivi karibuni, Makambo alifunga moja ya mabao ya Yanga katika ushindi wa mabao 3-2
Katika mchezo huo kocha msaidizi wa Yanga Cedric Kaze alisema Makambo alionyesha kiwango bora na huenda akapata nafasi zaidi kwenye kikosi cha kwanza katika mechi zilizobaki
Kaze alisema kwenye mchezo huo walijaribu kutumia washambuliaji wawili (4-4-2) ambapo Mayele na Makambo walicheza pamoja katika dakika 30 za mwisho
Alisema kutokana na ugumu wa michezo iliyobaki kumaliza msimu, zipo baadhi ya mechi watalazimika kutumia washambuliaji wawili
