Keshokutwa Jumatano Yanga itashuka uwanja wa Azam Complex, Chamazi kuikabili Azam Fc katika mchezo wa ligi kuu ya NBC mzunguuko wa 19
Utakuwa mchezo wa nne tangu kuanza kwa duru ya pili Yanga ikifanikiwa kushinda michezo yote mitatu ya kwanza katika duru ya pili
Hii inaitwa dabi ya Mzizima kwani ukiacha mchezo dhidi ya Simba, mchezo wa pili kwa ukubwa hapa Tanzania ni mchezo unaozikutanisha Yanga na Azam Fc
Yanga imejichimbia kambini Avic Town tangu Ijumaa iliyopita ikijiandaa na mchezo huo ambao Wananchi wanazihitaji alama zote tatu
Ni msimu ambao Yanga inahitaji kutwaa ubingwa baada ya kuukosa kwa misimu minne mfululizo ukichukuliwa na watani zao Simba
Kocha Mkuu wa Yanga Nasreddine Nabi katika moja ya mahojiano yake, alisema pamoja na kuongoza ligi kwa tofauti ya alama 11 dhidi ya Simba inayoshika nafasi ya pili, wataanza kufikiria ubingwa kama watashinda michezo miwili ya ligi katika mwezi huu
Mchezo wa kwanza ni huu dhidi ya Azam Fc na mchezo wa pili ni dhidi ya Simba ambao utapigwa April 30
Nabi anafahamu kama atapata ushindi katika michezo hii ni wazi atakuwa amejiweka katika nafasi nzuri zaidi ya kutwaa ubingwa
