Majira ya saa moja usiku leo, Wananchi watashuka uwanja wa Benjamin Mkapa kuikabili Geita Gold ukiwa ni mchezo wa robo fainali kombe la Shirikisho la Azam (ASFC)
Huu ni mchezo wa tatu kuzikutanisha Yanga na Geita Gold zikiwa tayari zimecheza mechi mbili za ligi kuu Yanga ikiibuka na ushindi wa bao 1-0 katika mechi zote
Leo wanakutana katika mchezo wa mtoano ambao lazima mshindi apatikane pale uwanja wa Benjamin Mkapa
Ni mchezo unaotarajia kuwa na upinzani mkali kwani Geita Gold ni moja ya timu imara kwenye ligi hasa baada ya maboresho waliyofanya katika usajili wa dirisha dogo
Mchezo huu unawakutanisha vinara wa kupachika mabao katika ligi kuu, Fiston Mayele akiongoza na mabao yake 11 huku George Mpole wa Geita Gold akiwa amefunga mabao tisa
Baada ya ushindi dhidi ya Azam Fc katika mchezo uliopita kwenye ligi, Yanga imepania kuendeleza ubabe wake kwa kushinda dhidi ya Geita Gold leo
Ushindi utawahakikishia kutinga nusu fainali na pengine watakutana na watani zao Simba ambao watacheza na Pamba Fc katika mchezo ambao haujapangiwa tarehe
Hata hivyo hautakuwa mchezo mwepesi, Geita Gold wanaonolewa na Fred Felix Minziro, wamedhihirisha kuwa timu imara na Wananchi watahitaji kuwa katika ubora wao ili kupata ushindi leo
