Mtaalam wa viungo klabu ya Yanga Helmy Gueldich amesema mshambuliaji Chico Ushindi atakapokuwa timamu kwa asilimia 100 atawashangaza wengi
Helmy amesema ushindi ni mchezaji mwenye kipaji kikubwa lakini bado hajaweza kukionyesha tangu alipojiunga na Yanga kutokana na majeraha yanayomsumbua
Ushindi alisajiliwa na Yanga katika usajili wa dirisha dogo mwezi Januari 2022 akitokea klabu ya TP Mazembe wakati kiungo Mukoko Tonombe akijiunga na TP Mazembe
Kocha Mkuu wa Yanga Nasreddine Nabi amewahi kutoa ufafanuzi kwa nini Ushindi hachezi mara kwa mara akitaja sababu ni majeraha ya nyama za paja yanayomsumbua
Ushindi alijiunga na Yanga akiwa na majeraha hayo, baada ya kutibiwa, madaktari walimuandalia program maalum ya mazoezi ili kuhakikisha tatizo lake linapona kabisa
Ushindi ambaye mara kadhaa ameitwa timu ya Taifa ya DR Congo, anafanya mazoezi chini ya uangalizi na karibuni atarejea uwanjani
Tangu ajiunge na Yanga, amecheza mechi mbili za ligi kuu, dhidi ya Mbeya City akiingia kwenye dakika 10 za mwisho na dhidi ya KMC ambapo alianza na kutengeneza bao la pili lililofungwa na Djuma Shabani katika mchezo ambao Yanga iliibuka na ushindi wa mabao 2-0
