Vinara wa ligi kuu ya NBC Yanga leo wanaendelea na msako wa ubingwa wa 28 pale watakaposhuka uwanja wa Benjamin Mkapa kuikabili Tanzania Prisons ukiwa ni mchezo wa ligi kuu raundi ya 23
Baada ya Wananchi kukosa ushindi katika michezo miwili iliyopita, huu ni mchezo ambao vijana wa kocha Nasreddine Nabi wataingia dimbani wakiwa na dhamira ya kuondoka na alama zote tatu
Hata hivyo wanakutana na Tanzania Prisons ambayo nayo inapambana kujiondoa katika nafasi za hatari ya kuteremka daraja
Katika michezo nane iliyobaki, kama Yanga itaweza kushinda michezo mitano, basi itajihakikishia kutwaa ubingwa mapema
Hivyo ni mchezo ambao Wananchi wanazihitaji alama zote tatu ili kuendelea kusogea karibu na ubingwa
Leo benchi la ufundi litaongozwa na kocha Nabi mwenyewe baada ya kumaliza adhabu ya kadi nyekundu
Nabi atakuwa na kikosi chake kamili, ni mchezaji mmoja tu Yacouba Songne ambaye bado hayuko tayari kucheza mechi za ushindani
Mchezo utapigwa kuanzia saa moja usiku
