Kabwili yuko tayari kuibeba Yanga

Moja ya faida kubwa iliyopata Yanga msimu huu ni kuwa na kikosi chenye vijana wengi.

Licha ya changamoto ya majeruhi, Yanga imeendelea kufanya vizuri kutokana na upana wa kikosi chake.

Mmoja wa vijana hao ni mlinda lango Ramadhani Kabwili.

Uwezo wa Kabwili langoni ambaye ndio kwanza ametimiza miaka 18 umewashangaza wengi.

Tayari amedaka dakika 165 katika kikosi cha Yanga (dakika 75 dhidi ya Lipuli na dakika 90 dhidi ya Njombe Mji) kwenye michezo ya ligi kuu ya Vodacom.

Kabwili alianza kun'gara kwenye michuano ya kombe la Mapinduzi mapema mwaka huu, michuano ambayo Yanga ilitolewa kwenye hatua ya nusu fainali.

Wakati Yanga inamsajili kinda huyu ilikuwa kwa ajili ya kumkuza na pia kumtumia kwa dharura pale walinda mlango wake Youthe Rostand na Benno Kakolanya wakiwa majeruhi.

Lakini hilo huenda likawa limebadilika hasa baada ya kuumia kwa walinda lango hao namba moja.

Kwa uwezo ulio-onyesha Kabwili huenda 'majeruhi' hao wakajikuta wanaendelea kukaa benchi hata pale watakapokuwa timilifu.

Kabwili anashabihiana sana na mlinda lango mkongwe Juma Kaseja ambaye naye alianza kun'gara kwenye kikosi cha Simba akiwa na miaka 18 tu mwishoni mwa miaka ya 90.

Akiendelea hivi, ni swala la muda tu, atakamilisha ndoto zake za kwenda kusakata kabumbu katika ligi maarufu barani Ulaya