Hatma ya Ngoma kujulikana wakati wowote

Ratiba ya michezo iliyokaribu imepelekea Kamati ya utendaji kushindwa kuweka wazi hatma ya mshambuliaji wa Yanga Donald Ngoma ambaye ni majeruhi.

Hivi karibuni uongozi wa Yanga ulitoa taarifa juu ya kuitishwa kwa kikao ambacho kingemaliza sintofahamu ya mshambuliaji wake huyo raia wa Zimbabwe.

Akizungumza na waandishi wa habari leo, Afisa Habari wa Yanga Dismas Ten amesema maamuzi juu ya swala la Ngoma yatawekwa hadharani wakati wowote.

"Ukaribu wa ratiba pamoja na kubanwa na majukumu kumepelekea kile ambacho kilipangwa kujadiliwa juu ya Ngoma kishindwe kufanyika," amesema Ten.

"Tuvumile, taarifa juu ya hatma yake itakuja baadae."

Ngoma amekosekana katika kikosi cha Yanga tangu mwanzoni mwa mwezi wa tisa mwaka jana akikabiliwa na majeruhi.

Uongozi wa Yanga ulilazimika kumuagiza daktari wake kufanya uchunguzi wa afya ya mchezaji huyo baada ya kutoridhishwa na mwenendo wake.