Jana katika Mkutano na Wanahabari, Kocha Mkuu wa Yanga Nasreddine Nabi alitoa ufafanuzi kukosekana kwa mshambuliaji Lazarus Kambole ambaye tangu aliposajiliwa na Yanga hajacheza mechi yoyote ya kimashindano
Nabi alibainisha kuwa Kambole ni majeruhi licha ya kufanya mazoezi na wenzake, hayuko timamu kuweza kucheza mechi za mashindano
Aidha Nabi alithibitisha kuwa usajili wa winga Tuisila Kisinda ulikuwa maalum kwa ajili ya kuchukua nafasi ya Kambole na kuwa Mzambia huyo angeendelea kuimarika na pengine atakapokuwa fit wataweza kumjumuisha kikosini
"Natambua uongozi ulimsajili Kisinda (Tuisila) kwa ajili ya kuchukua nafasi ya Kambole ambaye hawezi kucheza sasa kwa sababu ni majeruhu. Viongozi waliandika barua TFF kuomba mabadiliko ya mchezaji huyo hivyo tunasubiri," alisema Nabi
Hata hivyo taarifa ambayo bado sio rasmi ni kuwa Yanga italazimika kusubiri kumsajili Kisinda kwenye dirisha dogo baada ya Kamati ya Sheria na Hadhi za Wachezaji kubariki uamuzi wa TFF kumzuia Kisinda kuitumikia Yanga wakati huu kwa madai kuwa Yanga imekamilisha usajili wa wachezaji 12 wa kigeni
Taarifa iliyotolewa na TFF wiki iliyopita ilibainisha kuwa, wakati Yanga ikikamilisha usajili wa Kisinda kutoka RS Berkane, tayari TFF ilikuwa imewasilisha majina ya wachezaji 12 wa kigeni wa Yanga kwa shirikisho la mpira wa miguu Afrika (CAF) na kupatiwa leseni zao
