Baada ya ushindi wa mabao 4-0 katika mchezo wa mkondo wa kwanza, leo Yanga inakwenda kukamilisha mchezo wa mkondo wa pili michuano ya ligi ya mabingwa hatua ya awali dhidi ya Zalan Fc kutoka Sudan Kusini
Mchezo huo utapigwa uwanja wa Benjamin Mkapa kuanzia saa moja kamili usiku
Ili kufuzu raundi ya kwanza, Yanga inahitaji ushindi, sare au hata kufungwa sio zaidi ya mabao matatu
Hata hivyo Yanga hawatarajii kupoteza mchezo huo mbele ya mashabiki wao pamoja na kuwa wakati mwingine mpira unaweza kuwa na matokeo ya kikatili
Yanga ilidhihirisha ubora wake kwenye mchezo wa mkondo wa kwanza na matarajio ya wengi ni kuona wanaendeleza pale walipoishia katika mchezo huo ambao mshambuliaji Fiston Mayele alifunga mabao matatu 'hat-trik'
Kuelekea mchezo wa leo, Kocha Mkuu wa Yanga Nasreddine Nabi amebainisha kuwa atafanya mabadiliko madogo katika kikosi chake akiwakosa baadhi ya wachezaji ambao walipata majeraha kwenye michezo iliyopita
Nyota watatu Khalid Aucho, Djuma Shabani na Bernard Morrison hawatakuwa sehemu ya mchezo Nabi akibainisha nafasi zao ataweka wachezaji wengine
Mashabiki wa Yanga wameaswa kujitokeza kwa wingi katika mchezo huo ambao Yanga ni mwenyeji, viingilio ni rafiki ambapo mzunguuko ni Tsh 2,000/- tu
