Pamoja na ushindi wa mabao 5-0 ambao Yanga walipata dhidi ya Zalan Fc na kutinga raundi ya kwanza ya michuano ya ligi ya mabingwa barani Afrika kwa ushindi wa jumla wa mabao 9-0, Kocha Mkuu wa Yanga Nasreddine Nabi hakufurahishwa na wachezaji wake katika eneo la ushambuliaji wakipoteza nafasi nyingi
Katika mechi zote dhidi ya Zalan Fc, Yanga ilifunga mabao yote kwenye kipindi cha pili lakini nafasi nyingi zaidi zilitengenezwa katika kipindi cha kwanza lakini hazikutumika
Baada ya mapumziko ya mwishoni mwa wiki Yanga inarejea mazoezini kujiandaa na mechi zinazofuata kwenye ligi kuu lakini pia mchezo wa raundi ya kwanza ligi ya mabingwa dhidi ya Al Hilal
Kocha Msaidizi wa Yanga Cedric Kaze amesema watafanyia kazi changamoto zilizojitokeza katika mchezo dhidi ya Zalan, muhimu zaidi kuongeza umakini kwa washambuliaji ili waweze kutumia nafasi
"Ni kweli tungeweza kufunga mabao mengi zaidi katika mchezo dhidi ya Zalan Fc lakini tulipoteza nafasi nyingi. Hili sio jambo zuri kwa sababu zipo mechi tunaweza tusipate nafasi nyingi hivyo tunapaswa kutumia nafasi ipasavyo," alisema Kaze
Yanga inakabiliwa na michezo miwili ya ligi kuu ambayo itapigwa ugenini dhidi ya Ihefu Fc (Sept 29) na Ruvu Shooting (Oct 03) kabla ya mchezo wa mkondo wa kwanza ligi ya mabingwa dhidi ya Al Hilal ambao utapigwa Oct 7-9 katika uwanja wa Benjamin Mkapa
