Habari njema kwa Yanga ni kurejea kikosini kiungo mshambuliaji Feisal Salum 'Fei Toto' ambaye alitumia mapumziko ya kalenda ya FIFA kutibu majeraha aliyopata kwenye mchezo wa ligi ya mabingwa dhidi ya Zalan Fc
Lakini hii ni habari mbaya kwa Ruvu Shooting kwani kesho Jumatatu huenda wakakumbana nae pale dimba la Mkapa katika mchezo wa ligi kuu kati ya Ruvu Shooting dhidi ya Yanga
Fei Toto ana rekodi ya kipekee katika mechi alizokutana na Ruvu Shooting, takwimu za kuanzia mwaka 2018, amefunga mabao manne
Bao lake la nne lilikuwa msimu uliopita pale uwanja wa Benjamin Mkapa akiirejesha Yanga mchezoni kwa shuti kali kutoka umbali wa takribani mita 30
Yanga iliibuka na ushindi wa mabao 3-1 mabao mengine yakifungwa na Djuma Shaban na Mukoko Tonombe
Msimu mmoja nyuma, Fei Toto aliwatungua Ruvu Shooting mabao mawili katika mchezo wake wa kwanza ambao kocha Nasreddine Nabi alianza kumtumia nafasi ya kiungo mshambuliaji
Msimu wa 2018/19 Fei Toto alifunga bao la ushindi kwa Yanga kwenye dakika za majeruhi katika mchezo ambao Yanga iliibuka na ushindi wa mabao 2-1
Jumatatu anakutana na Ruvu Shooting, je ataendeleza rekodi ya kuwaadhibu maafande?
