Jumapili Yanga itaingia uwanja wa Benjamin Mkapa kuwakabili watani zao Simba katika mchezo wa ligi kuu ya NBC. Ni mchezo wa kwanza wa dabi kwenye ligi msimu huu
Lakini pia utakuwa mchezo wa pili kuzikutanisha timu hizo katika msimu huu ukitanguliwa na mchezo wa Ngao ya Jamii ambao Yanga ilishinda mabao 2-1
Zinapokuja mechi za dabi, Yanga ndiye mfalme wa mechi hizi ikipata ushindi mara nyingi kuliko watani zao
Ni takribani miaka mitatu sasa Simba haijaonja radha ya ushindi mbele ya Yanga katika mechi za ligi kuu
Februari 16 2019 ndio mara ya mwisho kwa Simba kushinda mchezo wa ligi kuu mbele ya Yanga, wakati huo Wananchi wakinolewa na Kocha Mwinyi Zahera
Tangu wakati huo, zimechezwa mechi sita za ligi, Yanga imeshinda mechi mbili na mechi nne kumalizika kwa matokeo ya sare
Katika mechi tano zilizopita kwenye mashindano yote, Yanga imeshinda tatu na mechi mbili kumalizika kwa sare
Ni rahisi kuelewa kwa nini mashabiki wa Simba kwa sasa tambo zao wamezielekeza Kimataifa zaidi na msemo wao siku hizi wanasema Yanga huwa wanakamia mechi za dabi ndio maana wanashinda sana!
Yanga ina kawaida ya kufanya vizuri katika mechi hizi bila ya kujali mazingira wanayopitia au aina ya kikosi walichonacho
Wakati huu Yanga itaingia kwenye mchezo huo ikiwa na mahitaji ya ushindi zaidi pengine kuliko ile mechi ya Ngao ya Jamii
Baada ya kuondoshwa kwenye michuano ya ligi ya mabingwa na kuangukia kombe la Shirikisho, wachezaji wa Yanga wanafahamu ushindi katika mchezo huo utarejesha tabasamu katika nyuso za mashabiki wao na kuwaongezea morali kuelekea mchezo wa kombe la Shirikisho dhidi ya Club Africain
