Kocha Mkuu wa Yanga Nasreddine Nabi amewaomba radhi mashabiki wa timu hiyo kwa kushindwa kutinga hatua ya makundi ligi ya mabingwa barani Afrika
Nabi ameahidi kuwapa furaha kwa timu yake kupata matokeo mazuri katika mchezo wa ligi kuu dhidi ya Simba ambao utapigwa kesho Jumapili katika uwanja wa Benjamin Mkapa
Nabi amesema maandalizi kuelekea mchezo dhidi ya Simba yamekamilika wakiwa wamejipanga kushinda mchezo huo
"Nawaomba radhi mashabiki wa Yanga kwa kushindwa kufuzu hatua ya makundi ligi ya mabingwa, nashukuru kwa upendo walionionyesha pamoja na kuniunga mkono kwani wapo ambao walitamani kuona nadondoka lakini haikuwa hivyo"
"Tumejiandaa vizuri kwa mchezo dhidi ya Simba, wachezaji wako tayari naamini tutapata matokeo mazuri," alisema Nabi
Akizungumzia utayari wa wachezaji kuelekea mchezo huo, Nabi amesema Bernard Morrison ndiye mchezaji ambaye atakosekana akitumikia adhabu wakati hatma ya Salum Abubakar 'Sure Boy' itategemea na mazoezi ya leo
"Morrison anatumikia adhabu wakati Sura Boy ametoka katika ugonjwa hivyo tutaangalia utayari wake katika mazoezi ya mwisho leo. Wachezaji wengine wote wako tayari"
