Wakati mwingine ni vyema sisi mashabiki tuupende mpira kwanza kabla ya mapenzi ya timu zetu
Kwa sababu kama unapenda timu zaidi kuliko mpira wenyewe, zipo nyakati timu yako itakosa matokeo mazuri na utakuwa kwenye wakati mgumu
Duniani hakuna timu ambayo itafanya vizuri katika kila mchezo zipo nyakati za kuanguka na kujipanga upya
Tuliona presha ambayo ilitengezwa dhidi ya Kocha Nasreddine Nabi baada ya matokeo ya mchezo wa kwanza dhidi ya Club Africain uliopigwa uwanja wa Benjamin Mkapa
Wapo wengine walikwenda mbali na kushinikiza Nabi aondolewe eti kwa kuwa ametoka suluhu ya bila kufungana na Club Africain
Wakasahau kuwa Nabi huyu huyu ndiye aliyeirejesha furaha Wananchi baada ya misimu minne ya mateso
Ni Nabi huyu huyu ambaye timu yake imecheza mechi 45 mfululizo katika ligi kuu pasipo kupoteza
Jana amewadhihirishia ni kwa kiasi gani ni kocha bora ambae kwa hakika kama viongozi wa Yanga wangeingia mtegoni wakati ule wa presha ya mashabiki, pengine wangejilaumu
Kila mmoja anaipongeza Yanga kwa kucheza vizuri dhidi ya Club Africain hapo jana na kupata ushindi wa bao 1-0
Lakini aliyetengeneza mpango mkakati wa mechi ile ni Nabi, alijua vijana wake wanahitaji kucheza vipi ugenini dhidi ya timu ngumu na hatimaye ushindi ukapatikana
Yanga imeingia makundi Shirikisho, huu unaweza kuwa msimu bora sana kwa Yanga katika michuano hiyo chini ya Nabi
Mwaka 2016 (Hans van Pluijm) na 2018 (Lwandamina/Zahera) Yanga ilicheza makundi ya Shirikisho na ilimaliza katika nafasi ya mwisho
Chini ya Nabi msimu huu Yanga itafanya zaidi ya kile walichofanya katika michuano hiyo miaka iliyopita
