Jioni ya leo Yanga itashuka uwanja wa Benjamin Mkapa kuikabili Mbeya City katika mchezo wa ligi kuu ya NBC ambao utapigwa kuanzia saa 12:15 jioni
Mechi nyingine ngumu kwa Wananchi kuwania alama tatu katika uwanja wa nyumbani
Ugumu wa mchezo huo unatokana na rekodi ya mechi za karibuni ambazo timu hizo zimekutana kwenye ligi
Katika mechi sita, Yanga iliibuka na ushindi katika mechi moja huku mechi tano zikimalizika kwa matokeo ya sare
Takwimu za msimu huu zinaibeba Yanga kuelekea mchezo huo ingawa Mbeya City nao ni timu ngumu kufungika
Kwa wastani Mbeya City ni timu iliyopata sare katika mechi zake nyingi msimu huu (7), ikishinda mechi nne na kupoteza mechi mbili
Yanga ina sare mbili tu na kushinda mechi nyingine (9) ikiwa kileleni mwa msimamo wa ligi
Leo kunako dimba la Mkapa kutakuwa na vita ya washambuliaji wawili wenye rekodi nzuri msimu huu Fiston Mayele na Sixtus Sabilo
Mayele anaongoza mbio za ufungaji bora akiwa na mabao 8 wakati Sabilo yuko nafasi ya pili akiwa amefunga mabao 7 lakini pia akiwa ametengeneza mabao 6
Kikosi cha Yanga leo kitaongezewa nguvu baadhi ya wachezaji waliokosa mechi zilizopita wakirejea
Djigui Diarra, Stephane Aziz Ki, Benard Morrison, Farid Mussa na Yannick Bangala wote wako tayari kwa mchezo huo
