Pongezi Lwandamina, pongezi Yanga

Licha ya kucheza bila ya mshambuliaji wa asili, Yanga imefanikiwa kufuzu raundi ya kwanza ya michuano ya ligi ya mabingwa barani Afrika baada ya kulazimishwa sare ya bao 1-1 dhidi ya St Louis.

Yanga imesonga mbele kwa faida ya ushindi wake wa bao 1-0 iliyopata nyumbani wiki iliyopita.

Kocha wa Yanga George Lwandamina anastahili pongezi kwa kuifanikisha Yanga kufuzu licha ya kuwakosa washambuliaji wake wote kutokana na majeruhi.

Ni mbinu za Lwandamina zilizofanikisha Yanga kufuzu kwenda raundi ya kwanza ya michuano hiyo ambayo bingwa anaibuka na zaidi ya Bil 2.

Lwandamina alimpanga kiungo Pius Buswita kama mshambuliaji wa kati lakini akajaza viungo wengi katikati walioisaidia Yanga kukaa na mpira huku wakifanikiwa kuzima mashambulizi ya St louis.

Papi Tshishimbi aliyetumika kama namba 10 kwenye mchezo huo, wakibadilishana majukumu na Ibrahim Ajib kwa nyakati tofauti, walikuwa na kazi ya kuhakikisha wanaunganisha safu ya ushambuliaji na kiungo.

Kisha akawapa maelekezo walinzi/washambuliaji wa pembeni Kessy na Gadiel kujaza langoni kwa St Louis krosi za chinichini.

Ni krosi ya chini ya Hassani Kessy iliyozaa matunda kwenye dakika za majeruhi za kipindi cha kwanza.

Said Juma Makapu na Pato Ngonyani walikuwa nguzo muhimu huku Makapu akin'gara zaidi akitokea upande wa kushoto.

Makapu aliumia kwenye kipindi cha pili na nafasi yake kuchukuliwa na Raphael Daudi.

Lwandamina amedhihirisha kuwa yeye ni miongoni mwa makocha bora kwani amekuwa akiiwezesha Yanga kupata matokeo katika mazingira magumu.