Makamu wa Rais klabu ya Yanga Arafat Haji amewatoa hofu Wanachama na Mashabiki wa timu hiyo kuwa watasajili wachezaji bora katika dirisha hili la usajili kwa kuzingatia mapendekezo ya benchi la Ufundi
Siku 11 zimepita tangu dirisha dogo la usajili lilipofunguliwa Mashabiki wakiwa na shauku ya kuona nyota wapya wakitua Jangwani kwa ajili ya kuboresha maeneo yenye changamoto
Arafat amesema tayari klabu iko kwenye mazungumzo na baadhi ya wachezaji akibainisha kuwa watasajili wachezaji wawili au watatu
"Si tuko vizuri nawaambia Wananchi wasiwe na wasiwasi, tuko kwenye mazungumzo na baadhi ya wachezaji. Tunaweza kusajili wachezaji wawili au watatu kabla dirisha kufungiwa"
"Pia tunao wachezaji ambao hatukuwasajili katika dirisha lililopita sasa wako tayari kuitumikia Yanga. Dhamira yetu ni kufanya maboresho ambayo yataimarisha zaidi kikosi chetu," alisema Arafat
Kulingana na mapendekezo ya kocha Nasreddine Nabi, mahitaji ya Yanga ni beki wa kati, kiungo mkabaji na mshambuliaji
