Thierry Manzi amvutia Lwandamina

Beki wa kati wa timu ya Taifa ya Rwanda Thierry Manzi amemvutia kocha wa Yanga George Lwandamina na huenda uongozi wa mabingwa hao wa kihistoria Tanzania wakatia timu nchini Rwanda kuichukua sahihi yake.

Manzi alikuja na kikosi cha Rwanda na alionekana kwa mara ya kwanza na kocha huyo kwenye mchezo wa kufuzu kwa michuano ya CHAN kati ya Stars dhidi ya Rwanda Jumamosi iliyopita.

Katika mchezo huo Stars ililazimishwa sare ya bao 1-1 jijini Mwanza huku Manzi akimdhibiti hasa mshambuliaji wa Stars John Bocco 'Adebayor'.

Yanga inasaka beki wa kati kuziba nafasi ya Vicent Bossou ambaye klabu imeamua kuachana nae.

Kwa sasa kocha Lwandamina anaangalia viwango vya Henry Okoh kutoka Nigeria na Fenando Bongnyang kutoka Cameroon ambao wanafanya majaribio.

Lakini kama hawatamvutia Mwalimu basi huenda Thiery Manzi akapewa nafasi hiyo kutegemeana na matokeo ya majadiliano.

Pia Yanga inasaka mbadala wa winga Simon Msuva baada ya Difaa Al Jadida ya Morocco kumalizana na uongozi juu ya mchezaji huyo.

Issa Yahya ‘Akilimali’ winga mwenye kasi aliyerejea hivi karibuni kutoka masomoni nchini Uganda ni miongoni mwa wachezaji wanaofuatiliwa, imefahamika.

Mwingine anayetajwa kufuatiliwa na uongozi wa Yanga ni Haruna Chanongo, winga wa Mtibwa Sugar.