Jana Yanga iliichapa KMC bao 1-0 katika mchezo wa ligi kuu uliopigwa uwanja wa Benjamin Mkapa
Kinda Clementi Mzize alifunga bao pekee la Yanga katika mchezo ambao Wananchi walijiongezea alama tatu ambazo zimezidi kuwaweka katika nafasi nzuri ya kutwaa ubingwa baada ya kufikisha alama 62, alama nane zaidi ya Simba inayoshika nafasi ya pili
Hata hivyo Kocha Mkuu wa Yanga Nasreddine Nabi alieleza kutofurahishwa na kiwango cha baadhi ya wachezaji wake
Wakati akizungumza na wanahabari baada ya mchezo, Nabi alikwenda mbali zaidi kwa kusema mchezo wa jana ndio mchezo mbovu zaidi ambao ameshuhudia timu yake ikicheza tangu alipojiunga nayo
Alisema baadhi ya wachezaji hawako tayari kubadilika, na yeye hayuko tayari kuwa na wachezaji wa aina hiyo katika timu yake
"Hii ni mechi mbaya sana katika mechi zote ambazo toka nimeanza kufundisha Yanga, wachezaji wanaweza kusema ni uchovu ila sio sababu ambayo wanaweza kutumia wachezaji wengine"
"Kwa sababu wachezaji wamesajiliwa ili kucheza, hata wale ambao walikuwa hawachezi nao ni wachezaji ambao wanapopata nafasi ya kuvaa jezi ya Yanga ni lazima waoneshe kitu walichonacho"
"Unapewa nafasi unashindwa kuonesha! kuna wengine toka miaka miwili wajiunge Yanga kiwango ni kile kile. Wachezaji wengine hawabadiliki, hawaoneshi tofauti na wakiwekwa nje mara fulani hachezi mara mwingine anacheza"
"Ndio maana mechi ya leo wachezaji waliopewa nafasi hawakutaka kujituma kwa kuonesha kile ambacho wanacho, wachezaji ambao wamepewa nafasi ya kuvaa jezi na hawakujituma," alisema Nabi
Katika mchezo huo Nabi alifanya mabadiliko makubwa ya kikosi ambapo alianza na Diarra, Kibwana, Byson, Bacca, Mwamnyeto, Mauya, Kisinda, Sure Boy, Mzize, Aziz Ki na Ambundo
