Wakati Yanga ilipomtangaza Mudathir Yahya kama usajili wa kwanza kwenye dirisha dogo wapo mashabiki waliponda usajili huo eti kwa kuwa hakuwa akitoka nje ya nchi
Imekuwa ni kasumba kwa mashabiki wa soka nchini kupenda zaidi usajili wa wachezaji kutoka nje ya nchi katika dirisha la usajili kuliko wale wa ndani
Mudathir tayari anewathibitishia Wananchi kuwa ni ingizo bora sana kwenye kikosi cha Yanga
Usajili wake haukuzuka tu, lilikuwa pendekezo la kocha Nasreddine Nabi ambaye alihitaji kuziba nafasi ya Feisal Salum 'Fei Toto' ambaye alijiengua kikosini
Wakati anasajiliwa ilikuwa haionekani Mudathir anawezaje kuwa mbadala wa Feisal?. Nabi alisema Mudathir atakapoiva atakuwa mchezaji wa kutegemewa kwenye kikosi cha kwanza
Mudathir amedhihirisha hilo mapema kwani kwa sasa sio rahisi tena kwa Nabi kumuweka nje
Uwezo wake wa kucheza zaidi ya nafasi moja kwa ufasaha uwanjani unamfanya kuwa mchezaji wa aina yake
Katika mchezo uliopita dhidi ya Real Bamako, Mudathir alianza eneo la kiungo cha chini akiwa sambamba na Yannick Bangala na juu yao akiwa Stephane Aziz Ki
Lakini baada ya dakika 45, Nabi akalazimika kumtoa Aziz Ki kumuingiza Khalid Aucho na Mudathir kusogea juu
Ndio wakati ambao Yanga ilitawala mchezo na kufanya eneo la kiungo litulie. Muda ana faida akiwa na mpira na hata asipokuwa na mpira
Ni mchezaji asiyetabirika anapiga pasi katika maeneo mazuri wakati timu inaposhambulia na bila mpira Muda ni mchezaji asiyechoka, anakimbia sana uwanjani na mahiri kwenye kupora na kuirejesha mipira kwenye himaya ya Yanga
Nabi amedhihirisha kwa mara nyingine yeye ni Profesa wa soka! Wale wachezaji wanao-onekana wa kawaida katika timu nyingine, wanakuwa bora katika timu yake
