Mabingwa wa soka Tanzania bara, Yanga leo wana kazi moja tu pale uwanja wa Benjamin Mkapa kwenye mchezo wa kombe la Shirikisho dhidi ya US Monastir
Mchezo huu wa kundi D, ambao utapigwa saa 1 usiku, una umuhimu wa kipekee kwa Yanga kwani matokeo ya ushindi yatawahakikishia Wananchi kufuzu hatua ya robo fainali
Afisa Habari wa Yanga Ali Kamwe amewataka mashabiki kujitokeza kwa wingi uwanjani leo kuwaongezea hamasa wachezaji wao katika mchezo ambao wanahitaji ushindi
Yanga imeandaa utaratibu wa aina yake ambapo msafara wa mashabiki utaanzia Jangwani majira ya saa 9 mchana kuelekea uwanjani
Kamwe amesema wingi wa mashabiki ni silaha muhimu kupata ushindi katika mchezo ambao hautakuwa rahisi
Monastir ndio vinara wa kundi D wakiwa na alama 10 wakifuatiwa na Yanga yenye alama saba
Monastir tayari wamefuzu hatua ya robo fainali lakini leo watakuwa wakisaka angalau alama moja ili kumaliza vinara wa kundi
Ushindi kwa Yanga utawahakikishia Wananchi kutinga robo fainali kwani watafikisha alama 10 ambazo haziwezi kufikiwa na TP Mazembe wala Real Bamako
Real Bamako na TP Mazembe zitachuana katika mchezo mwingine ambao utapigwa huko Mali
Kocha Mkuu wa Yanga Nasreddine Nabi jana aliwaambia wanahabari kuwa wachezaji wake wako tayari, ari na morali yao iko juu
Hakuna jambo wanafikiria zaidi ya kushinda mchezo huo na kulipa kisasi cha kufungwa mabao 2-0 katika mchezo kwanza uliopigwa Tunisia
