Jumapili ya wiki iliyopita Yanga iliandika historia ya kutinga robo fainali ya michuano ya kombe la Shirikisho barani Afrika baada ya ushindi wa mabao 2-0 dhidi US Monastir ya Tunisia
Ulikuwa ushindi ambao sio tu uliipeleka Yanga robo fainali, bali pia uliwahakikishia Wananchi kukaa kileleni mwa kundi D wakifikisha alama 10 sawa na Monastir lakini Yanga ikiwa na uwiano mzuri wa mabao ya kufunga na kufungwa
Baada ya kipigo, kocha mkuu wa US Monastir Darko Novic alikubali kuwa amepoteza mchezo dhidi ya timu bora huku akiwatabiria Wananchi kuwa wanaweza kutinga nusu fainali
US Monastir ni moja ya timu bora sana msimu huu, kikosi chao kina thamani ya zaidi ya Tsh Bilioni 20 wakiwa na msimu mzuri katika ligi ya Tunisia
Walifuzu play-off katika ligi ya kwao wakiwa vinara wa kundi B na sasa wanashika nafasi ya tatu kwenye play-off wakiwa na alama saba sawa na Esperance inayoshika nafasi ya pili
Etoile Du Sahel inaongoza ikiwa na alama 9 lakini imecheza mechi moja zaidi ya Monastir na Esperance
Mfumo wa ligi kuu ya Tunisia huchezwa katika makundi mawili ambapo timu nne za juu kwenye kila kundi zinafuzu kucheza ligi ya play-off ambayo hutoa bingwa
Lakini kocha wao Novic amekiri kushangazwa na uwezo wa Yanga walioonyesha katika dimba la Mkapa katika mchezo ambao Monastir walipiga shuti moja tu lililolrnga lango
"Kwangu mimi nawaona Yanga watafika mbali kwa kuangalia ubora wa timu yao na kuwa na kocha mzuri (Nabi) ambaye anafahamu vyema mashindano haya"
"Nabi ameiweka Yanga mahali salama kimbinu na kwamba hata timu yake inapokuwa nyuma inacheza vizuri," Novic alinukuliwa na Mwanaspoti
"Tulipocheza nao tukashinda (2-0) muda wote hatukuwa na utulivu wa kuona kama tumemaliza mechi. Nawaheshimu kwa kuwa wanaonesha kuna kazi kubwa kocha wao amefanya. Nilipokuwa nawafuatilia na kuangalia mechi zao sikuona kama kuna mchezo wamezidiwa umiliki wa mpira"
"Napenda wanavyocheza, wanakulazimisha, wakati wote wanataka mpira uwe katika miliki yao. Tulipocheza nao kisha kucheza na Tp Mazembe tuliona tofauti kubwa ilitosha kuona kwamba Yanga watakuwa washindani wetu wakubwa katika kundi letu"
"Silaha ya pili ya Yanga ni wale washambuliaji wawili kwenye eneo la mbele, yule namba 9 (Mayele) ni hatari anajua sana kufunga lakini pia anakasi. Kuna yule jezi namba 25 (Musonda) ndio tatizo zaidi, unapokuwa na washambuliaji wa namna ile wanawalazimisha mabeki kupoteza nidhamu yao kutokana na kasi yao. Kitu kibaya zaidi wanacheza kwa ushirikiano mkubwa"
