Kocha Mkuu wa Yanga Nasreddine Nabi leo anaongoza timu yake katika mechi ya tisa ya derby dhidi ya Simba
Mtanange huo utakaopigwa uwanja wa Benjamin Mkapa saa 11 jioni, una umuhimu wa kipekee kwa Yanga kushinda ili kujihakikishia ubingwa wa ligi kuu ya NBC mapema
Habari njema kwa Nabi na benchi la ufundi ni kuwa nyota wake wote wako tayari kutumika katika mchezo huo
Watakaokosekana ni mlinda lango Aboutwalib Mshery (majeruhi) na beki Mamadou Doumbia ambaye amesafiri nchini Mali kushiriki msiba wa Baba yake Mzazi
Nabi amekuwa hatabiriki kutokana na mabadiliko ya kikosi chake kutoka mchezo mmoja na mwingine
Hii ndio faida ya kuwa na kikosi kipana kulinganisha na mpinzani wake Robertinho Oliveira ambaye kikosi chake kinafahamika hata kabla ya kutangazwa
Ni wazi leo Nabi ataanza na kikosi kilicho tayari kucheza soka la kasi kutumia madhaifu ya safu ya ulinzi ya Simba
Lakini pia Yanga leo inahitaji kuwa imara na makini katika eneo la kiungo ili kuhakikisha hawatoi mwanya kwa wapishi wa Simba ambao ni Saido Ntibazonkiza na Clatous Chama
Huenda Nabi leo akatumia kikosi alichokitumia katika mchezo dhidi ya US Monastir kwa kuwaanzisha kennedy Musonda, Fiston Mayele na Jesus Moloko katika safu ya ushambuliaji
Huku eneo la kiungo akiwaweka Yannick Bangala, Khalid Aucho na Salum Abubakar 'Sure Boy' wakati Djigui Diarra, Juma Shaban, Joyce Lomalisa, Ibrahim Bacca/Dickson Job na Bakari Mwamnyeto wakinza safu ya ulinzi
Stephane Aziz Ki, Mudathir Yahya na Bernard Morrison nao wanaweza kuwa na nafasi katika mchezo huo ambao Yanga inasaka ushindi ili kufunga hesabu za ubingwa wa ligi kuu mapema
Yanga leo itashuka dimbani ikiwa katika uzi wake wa bahati, NYEUSI
