Mlinzi wa kati ya Yanga Ibrahim Bacca amefichua siri ya kuimarika kwa kiwango chake katika msimu mmoja ambao amewatumikia mabingwa hao wa Tanzania
Tangu ajiunge na Yanga katika usajili wa dirisha dogo msimu uliopita akitokea klabu ya KMKM, Bacca ameshuhudiwa kiwango chake kikiimarika na sasa akifanikiwa kupenya kwenye kikosi cha kwanza cha Kocha Nasreddine Nabi pia akiitwa kwa mara ya kwanza na kucheza kwenye timu ya Taifa ya Tanzania 'Taifa Stars'
Bacca amesema ubora wa wachezaji anaocheza nao kwenye safu ya ulinzi ndio siri ya mafanikio yake akieleza kujifunza na kupata ushirikiano kutoka kwao
Yanga inayoundwa na ukuta wa Joyce Lomalisa, Dickson Job, Bakari Mwamnyeto, Bacca, Mamadou Doumbia, Djuma Shaban, Kibwana Shomari na Yanick Bangala
Bacca amesema anafurahi kucheza na mabeki wote waliopo Yanga kutokana na kila mmoja kuwa na aina yake ya uchezaji
"Mabeki wote nimepata nafasi ya kucheza nao wana uwezo na ni viongozi wazuri kiwanjani lakini nafurahi zaidi nikicheza na beki mwingine kati na Bangala akawa juu kama namba sita ni mtu makini sana na anapenda kuzungumza mimi namuita beki kiongozi"
"Mkicheza uwanjani kwa kukumbushana majukumu mchezo wa mpira ni mwepesi na makosa mengi yanapungua tuna nahodha Mwamnyeto anazungumza ana kila sifa ya kuwa kiongozi lakini kuna Bangala hapendi timu ifungwe kizembe"
"Siwezi kutaja sifa za kila mchezaji ila kile kinachoonekana uwanjani kinatokana na kuaminiana na kupeana maelekezo ili kila mmoja aweze kufanya kwa ubora na timu ipate matokeo mazuri," alisema Bacca
