Klabu ya Marumo Gallants kutoka Afrika Kusini ambayo itachuana na Yanga kwenye mchezo wa mkondo wa kwanza nusu fainali ya kombe la Shirikisho barani Afrika bado haijawasili nchini na haijafanya mawasiliano na klabu ya Yanga
Kwa mujibu wa kanuni za CAF, Yanga ikiwa mwenyeji wa mchezo huo ina jukumu la kuwapokea wageni wao na kuhakikisha wanapata huduma zote muhimu ikiwa ni pamoja na kuwapa usafari kutoka uwanja wa ndege mpaka hoteli watakayofikia
Afisa Habari wa Yanga Ali Kamwe amesema klabu imefanya jitihada muhimu za kuwasiliana na Marumo lakini hawajajibu wala kutoa taarifa juu ya ujio wao
Hata hivyo Kamwe amesema wanazo taarifa ambazo sio rasmi kuwa klabu hiyo huenda ikawasili nchini mapema Jumanne ikiwa ni siku moja kabla ya mchezo dhidi ya Yanga
"Ni kweli hatuna taarifa za ujio wa Marumo Gallants. Tuliwaandikia barua kuwauliza wanakuja lini Tanzania hili ni jambo la kikanuni kabisa lakini hawakujibu hivyo mpaka hivi sasa hatujui wanakuja lini. Ila za ndani kabisa baada ya kufanya research yetu tumebaini wanakuja kesho asubuhi," alisema Kamwe
