Kocha Msaidizi wa Yanga Cedric Kaze amesema hawana hofu yoyote kuelekea mchezo wa mkondo wa kwanza nusu fainali kombe la Shirikisho barani Afrika dhidi ya Marumo Gallants
Yanga na Marumo zitachuana katika mchezo wa kwanza kesho Jumatano ambao utapigwa uwanja wa Benjamin Mkapa Yanga ikihitaji ushindi ili kujiweka katika nafasi nzuri ya kutinga fainali ya michuano hiyo
Kaze amesema wamepata muda mzuri wa kujiandaa na mchezo huo huku pia wakipata nafasi ya kuwasoma wapinzani wao hao kuelekea mchezo huo
Kaze amebainisha kuwa wanatambua ubora wa wapinzani wao pamoja udhaifu wao na wana nafasi kubwa ya kufanya vizuri katika mchezo huo wa kwanza nyumbani
"Tumepata muda wa kuangalia mechi yao na walipoteza, hii imetusaidia kupunguza presha, lakini tumeweza kuona mapungufu yao yapo katika nafasi zipi ambazo zinaweza kutusaidia kupata ushindi," alisema Kaze.
"Ukweli Marumo siyo wabaya na hatupaswi kuwadharau kutokana na nafasi waliyopo kwenye ligi ya kwao, kwa sababu ligi haina mtoano kama hii michuano ya CAF"
"Kikubwa tunaenda kucheza nao tukiwa hatuna presha kwa sababu tunajua tunaenda kucheza na mpinzani wa aina gani na yupo katika wakati gani, lakini tunachoweza kukiangalia upande wetu ni kutafuta matokeo ya ushindi," alisema Kaze
Marumo waliwasili nchini Alfajiri ya leo Jumanne kuelekea mchezo huo wa kwanza katika kusaka tiketi ya kutinga fainali ya michuano ya Shirikisho ya CAF
