Yanga yaja na mkakati wa kushinda Botswana

Baada ya mchezo dhidi ya Kagera Sugar leo, kikosi cha Yanga kitaendelea na maandalizi kwa ajili ya mchezo wa marudiano ligi ya mabingwa dhidi ya Twonship Rollers.

Benchi la Ufundi linaloongozwa na kocha George Lwandamina linaamini Yanga bado ina nafasi ya kufanya vizuri ugenini nchini Botswana kama itajiandaa kikamilifu.

Aidha uongozi wa Yanga umeandaa mpango mkakati wa kuhakikisha Yanga inaweza kupata matokeo nchini Botswana na hatimaye iweze kutinga hatua ya makundi ya michuano.

Moja ya mkakati ni kuhamasisha zaidi wachezaji kupambana ili kupata matokeo yatayowavusha hatua inayofuata.

Katibu Mkuu wa Yanga, Charles Mkwasa amesema wakifanikiwa kufuzu makundi, sehemu ya fedha watakazolipwa zitakuwa zawadi kwa wachezaji.

“Litakuwa ni jambo la ajabu mtu ukapata fedha kama hizo halafu ukashindwa kuwapatia wale waliochangia kufanikisha hilo. Hivyo, uongozi tumepanga kufanya hivyo,” alisema.

“Hata hivyo, hatuwezi kutangaza ni kiasi gani hasa ambacho tutawapatia katika fungu hilo ili tusije kuwavuruga wakapoteza utulivu kwa sababu suala la fedha ni nyeti. Kimsingi ijulikane wazi tu kwamba tukifuzu, basi wachezaji watanufaika"