Jumatano, May 17 Yanga itashuka uwanja wa Royal Bafokeng kumenyana na Marumo Gallants katika mchezo ambao Yanga inahitaji ushindi au matokeo yoyote ya sare ili kutinga fainali
Kikosi cha Yanga kilitua Afrika Kusini jana na kupata mapokezi makubwa kutoka kwa Watanzania waishio Afrika Kusini wakiongozwa na ubalozi wa Tanzania nchini humo
Baadae Yanga ilielekea Mji wa Rustenburg ulio umbali wa takribani kilomita 133 kutoka Johannesburg
Mchezo dhidi ya Marumo Gallants utapigwa katika Mji huo majira ya saa 1 usiku kwa saa za Tanzania siku ya Jumatano
Ni wazi hautakuwa mchezo mwepesi kwa kuangalia takwimu za Marumo wanapokuwa katika uwanja wao wa nyumbani
Katika mechi za kombe la Shirikisho msimu huu kuanzia hatua ya mtoano na makundi, Marumo wameshinda mechi zote walizocheza nyumbani
Wakati Yanga ikiondoka uwanja wa Kimataifa wa Mwalimu Julius Nyerere jana, Kocha Mkuu wa mabingwa hao wa Tanzania Bara Nasreddine Nabi alisema wanakwenda kucheza mechi ngumu ambayo itawahitaji wachezaji wake kuwa makini na kuvuja jasho jingi ili kupata matokeo mazuri
Yanga iko mbele kwa mabao mawili kutokana na ushindi wa 2-0 waliopata katika mchezo wa kwanza uliopigwa jijini Dar es salaam, ushindi, sare na hata kupoteza kwa tofauti ambayo sio zaidi ya bao moja, yatakuwa matokeo ambayo yataipeleka Yanga fainali
Nyota wa Yanga wako tayari kupambana ili kuhakikisha wanakwenda fainali. Mafanikio ya aina hii hayatokei kila mwaka, rekodi zimeandikwa na zinaweza kudumu kwa miaka mingi kwa kizazi hiki cha wachezaji wa Yanga
Msimu huu katika mashindano yote ya CAF (Ligi ya Mabingwa na Shirikisho) Nabi amepoteza mechi mbili tu ugenini dhidi ya Al Hilal na US Monastir
Wananchi wanamuamini na bila shaka ataandaa mkakati wa kukabiliana na Marumo huko kwao na kuhakikisha Yanga inapata matokeo mazuri ugenini na kufuzu hatua ya fainali
