Kocha Mkuu wa Yanga Nasreddine Nabi amesema wana dakika 90 ngumu za kuipigania heshima ya Yanga katika mchezo wa mkondo wa pili nusu fainali ya kombe la Shirikisho barani Afrika dhidi ya Marumo Gallants
Yanga tayari iko Afrika Kusini ikijiandaa na mchezo huo ambao utapigwa kesho Jumatano, saa 1 usiku. Yanga iko mbele kwa mabao 2-0 ushindi waliopata kwenye mchezo wa mkondo wa kwanza uliopigwa uwanja wa Benjamin Mkapa
Hata hivyo Nabi amesema mchezo wa kesho ni tofauti, hawafikirii matokeo ya mchezo wa kwanza, watahitaji kupambana ili kupata matokeo mazuri yatakayowavusha hatua ya fainali
"Tunakwenda kwenye mchezo utakaoamua hatma yetu kama tutamalizia mguu wa pili kwenda fainali au vinginevyo, mimi ukiniuliza nitarudia kukwambia hii ni mechi ngumu kwetu kuliko ile ya kwanza"
"Nimewaambia wachezaji wangu kwamba tunatakiwa kuipigania heshima ya klabu yetu kwa kucheza kama wanajeshi, tuna jukumu la kuipigania Yanga na Tanzania"
"Natamani kuona kila mchezaji akicheza kwa jihadi na kujitolea nguvu zake zote kama anavyocheza beki wetu Bacca, napenda sana kumuona anavyojituma uwanjani, tunatakiwa kukaba kwa nguvu na kushambulia kwa nguvu lakini kikubwa tukipata nafasi tuzitumie"
"Wapinzani wetu watakuja na nguvu kubwa kutokana na matokeo ya mchezo uliopita nasi tunatakiwa kuwa na nguvu ya kutoruhusu watufunge kuwathibitishia kwamba hatukubahatisha," alisema Nabi
Leo Yanga itakamilisha mazoezi yake ya mwisho katika uwanja wa Royal Bafokeng ambao utatumika katika mchezo siku ya Jumatano
