FT : Township Rollers 0-0 Yanga, agg(2-1)

Yanga imeondoshwa kwenye michuano ya ligi ya mabingwa barani Afrika baada ya kutoka suluhu ya bila kufungana na mabingwa wa Botswana, Township Rollers kwenye mchezo wa pili uliozikutanisha timu hizo leo.

Towsnhip Rollers imetinga hatua ya makundi ya michuano hiyo kwa ushindi wa jumla wa mabao 2-1 iliyopata kwenye mchezo wa kwanza uliopigwa jijini Dar es salaam March 07.

Safu ya ulinzi ya Yanga pamoja na mlinda lango Youthe Rostand walilikuwa imara leo licha ya mashambulizi mfululizo kutoka kwa vijana wa Roller, hawakuruhusu bao kutinga nyavuni kwao.

Yanga sasa inasubiri kupangiwa moja ya timu zitakazotinga hatua ya 16 bora michuano ya kombe la Shirikisho kusaka tiketi ya kutinga hatua ya makundi ya michuano hiyo.

Licha ya kutopata ushindi leo, kikosi cha Yanga kinastahili pongezi kwani kimecheza vizuri hasa katika kujilinda licha ya changamoto ya maamuzi yasiyoridhisha kutoka kwa mwamuzi wa mchezo huo ambapo wachezaji takribani sita wa Yanga walionyeshwa kadi za njano.

Baada ya kukosa kutinga hatua ya makundi ligi ya mabingwa, Yanga sasa inahitaji kujipanga ili kuhakikisha inatinga hatua ya makundi ya michuano ya kombe la Shirikisho.