Baada ya kuishuhudia Yanga katika mechi tatu za ushindani, kuna mabadiliko ya kiuchezaji kati ya sasa na ilivyokuwa msimu uliopita chini ya kocha Nasreddine Nabi
Kama ni kwenye ujenzi, Nabi alitengeneza msingi, sasa Miguel Gamondi anakamilisha ujenzi wa nyumba
Katika misimu ya karibuni kwenye soka la Tanzania, haijawahi kushuhudiwa timu inayocheza soka la kushambulia katika kiwango ambacho Yanga wanafanya
Nafikiri kigezo cha kwanza ambacho Gamondi anatumia pale anapopanga kikosi chake, lazima mchezaji uwe fit na tayari kukimbia sana uwanjani
Kwa aina hii ya uchezaji ipo siku kuna timu itashushiwa mzigo wa magoli! Yanga ya Gamondi ni marufuku kwa timu pinzani kumiliki mpira hata kwa sekunde 30
Timu inapopoteza mpira utaona wachezaji wanavyohaha kuurudisha kwenye himaya yao haraka
Kwa aina ya 'intensity' ambayo Yanga wanacheza nayo, ni timu chache sana ambazo zinaweza kuhimili kwa dakika zote 90
Jambo pekee ambalo Gamondi anahitaji kulifanyia kazi ni umaliziaji. Kama Yanga itatumia angalau nusu ya nafasi wanazotengeneza basi kila mechi watakuwa wakiondoka na ushindi mnono
Tumezoea timu nyingi huanza mchezo taratibu na kumaliza kwa kasi au kuwa na vipindi vya umiliki wa mchezo lakini ni tofauti kwa Yanga. Inavyoanza ndio hivyo hivyo itakavyomaliza
Jana katika mchezo dhidi ya Asas Fc, zilifika nyakati Asas licha ya kuwa nyuma kwa mabao 2-0, walilazimika kujiangusha, kupoza mashambulizi na kupoteza muda maana sio kwa 'moto' waliokuwa wakipelekewa...!
