Kiungo mshambuliaji wa Yanga, Maxi Nzengeli amesema kuwa anataka kuendeleza moto wa rekodi yake ya kuwa kinara wa kutoa pasi za mabao aliyoiacha nchini kwao, DR Congo alipokuwa akiichezea Maniema FC
Maxi anasema ingawa mashabiki wa Yanga wamempokea vizuri tangu alipoanza kucheza, lakini bado hajaanza kwa kasi ya kuzalisha mabao, ingawa ameshafanya hivyo mara mbili tatu
Akicheza mchezo wake wa kwanza wa kirafiki dhidi ya Kaizer Chiefs ya Afrika Kusini, Maxi alitoa pasi yake ya kwanza ya bao pekee la ushindi, lakini pia akatoa pasi yake ya pili dhidi ya Azam FC kwenye mchezo wa Ngao ya Jamii, iliyotumiwa na Stephanie Azizi KI
Katika mchezo dhidi ya KMC, Max alitoa pasi ya goli la tano lililofungwa na Pacome Zouzoua. Kiungo huyo amesema tayari wameanza kuzoeana ndani ya kikosi chao na kuanza kwa ligi anataka kufufua ubora wake huo ambao utaisaidia timu
"Naweza kutoa pasi za mabao na hata kufunga, unajua hapa Yanga ndiyo nilikuwa nafika, ilihitaji muda kidogo kuzoeana na wenzangu vile wanavyocheza, kitu ambacho sasa kimeanza kukaa sawa"
"Tuna timu nzuri ambayo kila mchezaji ana ubora mkubwa, naamini mabao yataanza kuja kwa wingi muda si mrefu, kwangu kitu nataka kukifanya ni kuendeleza rekodi yangu ya kuzalisha pasi za mabao na hata kufunga ili kusaidia timu," alisema Maxi
