Ligi Kuu ya NBC inaendelea leo kwa mchezo mmoja kupigwa ambapo mabingwa watetezi Yanga watashuka uwanja wa Azam Complex, kumenyana na JKT Tanzania
Utakuwa mchezo wa pili kwa Yanga msimu huu, Wananchi wakianza ligi kibabe kwa ushindi wa mabao 5-0 dhidi ya KMC katika mchezo wa kwanza
Matarajio ya Wananchi ni kuona timu yao ikiibuka na ushindi leo ambapo ushindi wa kuanzia mabao mawili 2-0 utaipeleka Yanga kileleni mwa msimamo wa ligi
Baada ya Azam Fc kupata ushindi wa mabao 3-1 dhidi ya Prisons jana, walikaa kileleni mwa msimamo wa ligi wakiwa na alama sita, mabao 7 ya kufunga na kuruhusu bao 1
Hata hivyo ni wazi hautakuwa mchezo mwepesi kwani JKT Tanzania inayonolewa na kocha Malale Hamsini, imesheheni wachezaji wenye uzoefu mkubwa wa ligi
Timu hiyo iliyopanda daraja msimu uliopita, asilimia 90 ya wachezaji wapya waliowasajili wameshiriki ligi kuu kwa muda mrefu
Kocha Mkuu wa Yanga Miguel Gamondi amesema hawatawadharau wapinzani wao lakini wataingia katika mchezo huo kwa lengo moja tu, kuzisaka alama zote tatu ili kuwapa furaha mashabiki wao ambao wamekuwa na sapoti kubwa kwa timu yao
Mchezo utapigwa kuanzia saa 1 usiku..
