Kocha Mkuu wa Al Merrikh Lee Clark amesema haikuwa rahisi kwao kukabiliana na Yanga katika mchezo wa mkondo wa kwanza kuwania tiketi ya kutinga makundi ya ligi ya mabingwa barani Afrika
Mchezo huo uliopigwa nchini Rwanda ulishuhudia Wananchi wakiibuka na ushindi wa mabao 2-0 na kujiweka katika nafasi nzuri zaidi ya kutinga makundi wakihitaji ushindi au matokeo yoyote ya sare katika mchezo wa mkondo wa pili ambao utapigwa siku ya Jumamosi katika uwanja wa Azam Complex
Clark amesema kwa sasa Yanga ni moja ya klabu kubwa na zinazoogopwa barani Afrika kutokana na kile walichofanya katika michuano ya kombe la Shirikisho msimu uliopita
Hata hivyo amesema vijana wake watakuja Dar wakiwa na dhamira ya kushinda, licha ya kuwa nyuma kwa mabao 2-0
"Yanga ni miongoni mwa timu zinazoogopwa kwa sasa Barani Africa, Sisi tutawaheshimu lakini hatutakaa nyuma, kama Yanga waliweza kupata magoli mawili ugenini hata sisi tunaweza kupata magoli mawili ugenini," alisema
Al Merrikh imekuwa na historia nzuri katika misimu sita iliyopita ikifanikiwa kucheza hatua ya makundi ya ligi ya mabingwa barani Afrika
Ni wazi bado mechi haijamalizika ambapo hata kocha wa Yanga Miguel Gamondi amesema wanafahamu mchezo wa marudiano utakuwa mgumu zaidi na hawafikirii matokeo waliyopata katika mchezo wa kwanza
"Bado hatujafuzu, tuna mechi nyingine ngumu nyumbani, tunajiandaa kikamilifu tunajua Al Merrikh watakuja kwa nguvu, hawana cha kupoteza hivyo tunapaswa kuwa makini kuhakikisha tunafanya vizuri zaidi nyumbani," alisema Gamondi
