Katika kikosi cha Yanga Kocha Miguel Gamondi amekuwa na uhuru wa kufanya 'rotation' ya wachezaji kutoka mechi moja na nyingine kulingana na mahitaji ya mchezo husika
Hata hivyo kiungo Khalid Aucho anaweza kuwa moja ya wachezaji ambao Gamondi hafanyi kamali kumuweka nje
Katika msimu huu Aucho alikosa mechi moja tu ya mashindano dhidi ya Asas Fc ukiwa mchezo wa mkondo wa pili hatua ya awali ligi ya mabingwa
Unaweza kusema kama nyumba inahitaji msingi ili iweze kuwa imara basi Aucho yeye ndiye msingi wa Yanga katika eneo la kiungo
Aucho alijipambanua kuwa mchezaji muhimu tangu mabingwa hao wa nchi wakinolewa na Nasreddine Nabi
Ni wazi kukosekana kwake katika mechi mbili za fainali kombe la Shirikisho barani Afrika dhidi ya USM Alger msimu uliopita kulikuwa na athari na pengine kama angekuwepo matokeo yangeweza kuwa tofauti
Umahiri wake katika eneo la kiungo unaipa Yanga utulivu na kucheza aina ya soka la kuvutia
Msimu huu yawezekana Aucho na Djigui Diarra ndio wachezaji waliocheza dakika nyingi zaidi kwenye kikosi cha Yanga mpaka sasa
