Msimu wa 2022/23 ulikuwa wa mafanikio makubwa kwa Yanga ambapo mabingwa hao wa Tanzania Bara walitwaa mataji yote ya ndani pamoja na kucheza fainali ya kombe la Shirikisho (CAF CC)
Ilikuwa ngumu mashabiki kuamini pale walipopewa taarifa kuwa kocha wao mkuu Nasreddine Nabi anaondoka pamoja na watu wake muhimu katika benchi la ufundi
Kwenye Mkutano Mkuu wa mwaka Rais wa Yanga Injinia Hersi Said akatangaza ujio wa Miguel Gamondi raia wa Argentina
Wananchi wakapewa taarifa kuwa Gamondi ataunda benchi lake la ufundi wakati huo Wananchi wakitamani kumuona tena kikosini aliyekuwa kocha wa fitnes, Helmy Gueldich
Kinyume na matarajio ya wengi, Gamondi akamtangaza, Taibi Lagrouni kutoka Morocco kuwa kocha mpya wa viungo
Lagrouni amehitaji miezi miwili tu kuwasahaulisha Wananchi jina la Helmey ambaye alijiunga na Orlando Pirates ya Afrika Kusini
Lagrouni ndiye mwenye jukumu la kuweka utimamu wa wachezaji sawa na kwa hakika ameifanya kazi yake vyema
Yanga inacheza soka gumu ambalo limewapa shida timu zote zilizokutana nazo msimu huu kukiwa hakuna timu iliyofanikiwa kuinyanyasa kwa umiliki wa mpira kwenye michezo yao 9 waliyocheza kwenye mashindano yote.
Gamondi amesema haikuwa bahati mbaya kumleta Lagrouni ambaye amewahi kuitumikia RS Berkane. Alimfahamu kwa muda mrefu
"Namjua kwa muda mrefu ni kocha mzuri mwenye uzoefu mkubwa wa kuwandaa wachezaji, kwangu mimi ni mmoja kati ya msaidizi wangu ambaye amesaidia kuwaimarisha wachezaji wetu hapa,"alisema Gamondi
Katika kuimarisha kazi ya Lagrouni mabosi wa Yanga nao wakashusha vifaa kibao vya mazoezi kambini Jijini Dar es Salaam ambavyo ni mahitaji ya kocha huyo raia wa Morocco.
Vifaa hivyo vya kumpimia kasi ya mchezaji jinsi gani amekimbia ndani ya uwanja lakini pia vifaa vya kufanyia mazoezi tofauti vimeshushwa kambi ya Yanga ambavyo vilihitajika na makocha hao.
