Wakati Rais wa Yanga Injinia Hersi Said anaingia madarakani pamoja na mwenzake Makamu wa Rais Arafat Haji kuna propaganda ziliendeshwa sana mitandaoni kuwa 'watoto' hawa hawawezi kuifanyia Yanga makubwa
Lakini wakiwa katika mwaka wa pili wa uongozi wao, kila kitu kimebaki historia, Yanga imetwaa mataji yote ya ndani katika misimu miwili iliyopita pamoja na kucheza fainali ya kombe la Shirikisho barani Afrika
Yanga sasa inashika nafasi ya 18 katika viwango vya ubora wa CAF kutoka nafasi ya 75 ndani ya miaka miwili tu
Ni hivi karibuni CAF wameitaja Yanga kuwa moja ya klabu 10 zinazowania tuzo ya klabu bora ya mwaka 2023 barani Afrika
Mabadiliko ya mfumo wa uendeshaji wa klabu yameongeza Wadhamini na sasa Yanga inaweza kuwa klabu inayoongoza kwa kuingiza mapato kutoka kwa wadhamini katika ligi kuu ya NBC
Sasa Yanga imefikisha zaidi ya Wanachama 79,000 katika miaka miwili ya Mabadiliko malengo yakiwa kufikisha Wanachama 100,000
Tumeshuhudia maboresho katika benchi la ufundi na wachezaji, leo hii mashabiki wa Yanga wana kila sababu ya kutamba kwani wana kikosi bora pamoja na benchi bora la ufundi chini ya Kocha Miguel Gamondi
Katika kizazi cha vijana wa sasa hakuna aliyewahi kushuhudia Yanga ikipata ushindi wa mabao matano dhidi ya Simba, juzi vijana wa kizazi pipya wameshuhudia!
Ilikuwa imepita miaka 55 tangu Yanga iliposhinda mabao matano au zaidi katika mchezo wa dabi dhidi ya Simba
Ni ushindi wa kihistoria ambao Yanga waliupata mbele ya Simba iliyotimia! Mara nyingi Yanga ilipoteza mechi dhidi ya Simba kwa idadi kubwa ya mabao ikiwa kwenye migogoro
Kwa hakika huu ndio wakati bora zaidi wa mafanikio kwa Yanga katika miaka 88 tangu klabu ilipoundwa
