Kocha Mkuu wa Yanga Miguel Gamondi amesema kikosi chake kimepoteza mchezo dhidi ya CR Belouizdad lakini hawajapoteza malengo yao katika michuano ya ligi ya mabingwa barani Afrika
Yanga ilirejea nchini Alfajiri ya leo wakitokea Algeria ambako walipoteza mchezo wa kwanza wa hatua ya makundi kwa kufungwa na CR Belouizdad mabao 3-0
Gamondi amesema pamoja na vijana wake kucheza vizuri mchezo huo, walifanya makosa matatu ambayo yaliwanufaisha wapinzani wao
"Tulifanya makosa makubwa matatu, nadhani ndio hayo ambayo yamewapa ushindi wenzetu, ni makosa ya kushindwa kucheza kwa nidhamu ya mchezo, hayo ndiyo matokeo ya soka wakati mwingine unaweza kucheza vizuri lakini matokeo akapata mpinzani"
"Hatuna muda wa kupoteza, tunarudi kujiandaa na mchezo ujao, tutakwenda kukutana na timu nyingine bora, hatuna budi kusahau yote ya mchezo huu kwani ile ni mechi nyingine dhidi ya timu nyingine"
"Tunarudi moja kwa moja kambini kuanza maandalizi, hakutakuwa na muda wa kupumzika, tumezungumza na wachezaji tutarudi eneo la mazoezi kujipanga ili makosa kama haya yasijirudie," alisema Gamondi
