Baada ya kurejea kutoka Ghana, kikosi cha Yanga leo kimerejea mazoezini Avic Town kujiandaa na mchezo unaofuata ligi kuu ya NBC dhidi ya Mtibwa Sugar
Mchezo huo utapigwa Jumamosi Disemba 16 katika uwanja wa Azam Complex, saa 12:30 jioni
Kocha Mkuu wa Yanga Miguel Gamondi amesema malengo yake ni kuona wanafanya vizuri katika mchezo huo ambao utakuwa sehemu ya maandalizi yao kuelekea mchezo wa raundi ya nne ligi ya mabingwa dhidi ya Medeama ambao utapigwa uwanja wa Benjamin Mkapa, Disemba 20
"Tunarejea mazoezini kujiandaa na mchezo wa ligi dhidi ya Mtibwa Sugar ambao ndio unaofuata kwa mujibu wa ratiba"
"Kwa sasa tunaelekeza akili zetu katika mchezo huo ili kuhakikisha tunashinda kabla ya kufikiria mechi ya ligi ya mabingwa," alisema Gamondi
Baada ya kikosi chake kutua nchini kutoka Ghana, Gamondi aliwahakikishia Wananchi kuwa bado nafasi kufuzu robo fainali ya ligi ya mabingwa wanayo na watapambana katika mechi tatu zilizobaki
Gamondi alieleza masikitiko yake kwa kikosi chake kukosa ushindi katika mchezo dhidi ya Medeama ambao anaamini walistahili kushinda lakini waamuzi 'waliwabania'
"Bado tuna nafasi jambo zuri pia ni kwamba bado tuna timu imara kupigania malengo yetu, kuna mambo ambayo huwezi kubaki kulalamika unapoona yanatokea, ilikuwa ni safari ambayo kwa haki Yanga ilikuwa inarudi na ushindi lakini haikuwa hivyo kwa makosa ambayo hayapo ndani ya timu yetu"
"Kitu muhimu sasa ni kujipanga vizuri tuna mechi tatu ambazo lazima tubadilishe mambo ili hesabu zizidi kuwa kwetu najivunia wachezaji wangu na hata mashabiki wetu hasa hizi mechi mbili za nyumbani kabla ya kwenda kumalizia ugenini, lazima tujitoea kwa kiwango kikubwa," alisema Gamondi
