Bilionea Ghalib Said Mohammed 'GSM' amelipa Tsh Milioni 225 kununua tiketi zote za Mzunguuko kwa ajili ya Wananchi kuujaza uwanja wa Benjamin Mkapa siku ya Jumatano katika mchezo wa ligi ya mabingwa dhidi ya Medeama Fc
Umuhimu wa mchezo huu umepelekea 'tajiri' kutoa fursa kwa mashabiki kujitokeza kwa wingi ili kuwaongezea wachezaji wao hamasa katika mchezo ambao Yanga inahitaji ushindi
Sasa kwa kuwa tiketi hizi ni kwa ajili ya mashabiki na Wanachama wa Yanga tu, Msemaji wa Yanga Ali Kamwe jana alitangaza utaratibu ambao utatumika kugawa tiketi hizo
Siku ya Jumatano, mageti ya uwanja wa Benjamin Mkapa yatafunguliwa saa 2 asubuhi ambapo utaratibu wa kugawa tiketi hizo utaanza muda huo
Sharti ili upate tiketi lazima uwe na jezi ya Yanga yenye nembo ya GSM. Jezi hiyo sio lazima iwe ya msimu huu, hata ikiwa ya misimu mitatu iliyopita ilimradi tu iwe imetengenezwa na GSM
Katika mchezo dhidi ya Al Ahly wengi wanakumbuka vurugu zilizotokea ambazo zilianzishwa na mashabiki waliokuwa kwenye jukwaa la Al Ahly lakini Yanga ilitakiwa kulipa gharama ya uharibifu uliojitokeza
Kama Yanga isingeweka sharti hili la jezi pengine mashabiki wa upande wa pili wangetumia fursa hiyo kuingia kwa wingi na yale yaliyojitokeza mchezo dhidi ya Al Ahly yakajitokeza tena
Kwa anayetaka kuingia uwanjani kupitia ofa ya GSM basi atapaswa kununua jezi kama sivyo akate tiketi za VIP A, B na C. Eneo la Mzunguuko ni maalum kwa ajili ya Wananchi tu
Shabiki ni mchezaji wa 12 uwanja, Yanga imeitumia silaha hiyo kikamilifu, ni suala la mashabiki kujitokeza kwa wingi kuhakikisha Medeama wanaziacha alama zote tatu Jumatano
