Meneja wa kitengo cha Habari na Mawasiliano klabu ya Yanga Ali Kamwe amesema klabu inakwenda kujibu kilio cha wale waliohitaji timu hiyo kusajili mshambuliaji lakini ametoa tahadhari usajili huo utakuja na maumivu makali kwa wapinzani
Siku chache zilizopita, Kamwe alitangaza kuwa Wananchi wana siku saba za kusubiri kabla ya utambulisho wa mshambuliaji mpya
Ni siku nne zimebaki kabla ya Yanga kumtangaza mshambuliaji huyo ambaye Kamwe aliweka bayana kuwa sio mgeni kwani wengi wanamfahamu
Kamwe amesema kwa sasa Yanga inae mchezaji kinara wa mabao katika ligi kuu ya NBC, Stephane Aziz Ki lakini kwa kuwa kuna ambao hawajatosheka na vipigo basi wanaleta mshambuliaji ili kuongeza uzito wa vipigo vyao
"Kama tunae mshambuliaji kama Aziz Ki ambae anaongoza kwa ufungaji akiwa na mabao 10 na bado mnauliza usajili wa mshambuliaji mpya, ni ishara hamridhiki na vipigo vyetu, nyie mnataka tuje tumpige mtu 8 au 9 ndio mridhike? Haya sasa hesabuni siku tunamleta huyo mshambuliaji mnaemtaka," alitamba Kamwe
Wachezaji wanaotajwa zaidi kuhusishwa na mchezaji huyo ni Simon Msuva na Moses Phiri ambaye inaelezwa yuko kwenye mchakato wa kuvunja mkataba wake na Simba
Hata hivyo huenda Yanga ikamrejesha Msuva ambaye hivi karibuni alifikia makubaliano ya kusitisha mkataba wake na JS Kabylie ya Algeria
Msuva ni mchezaji wa ndani hivyo usajili wake hautahitaji kupunguza mchezaji mwingine kama ambayo Yanga italazimika kufanya kama itasajili mchezaji wa kigeni. Ni lazima ipunguze nyota mmoja wa kigeni kwa kuwa idadi ya wachezaji 12 wa kigeni imetimia
