Bodi ya Ligi wakati wowote itatangaza kuendelea kwa ratiba baada ya timu za Taifa za Tanzania na Zambia kutolewa katika michuano ya Afcon 2023 inayoendelea huko Ivory Coast
Mtendaji Mkuu wa Bodi Almas Kasongo amesema wakati wowote kuanzia leo watatangaza tarehe ya ligi hiyo kurejea
Kasongo amesema kwa mujibu wa kanuni timu ambayo itakuwa na kuanzia wachezaji watatu katika timu ya Taifa, mechi zake zitasimama lakini kwa sasa hakuna timu ya ligi kuu ambayo ina wachezaji watatu au zaidi katika timu za Taifa
"Kama tulivosema toka awali, Ligi yetu itarejea rasmi pale tutakapokuwa tumerejea kutoka kwenye fainali za Afcon 2023, muhimu tunazingatia kanuni"
"Endapo klabu itakuwa na wachezaji wasiopungua watatu kwenye timu ya taifa maana yake michezo yake itasimama lakini kwa mazingira ambayo tunayo hulioni tena hilo"
"Kesho (leo) tutakaa kama Bodi kufanya majumuisho na kutangaza rasmi tarehe ya kurudi kwa Ligi Kuu ya NBC. Tunarudi vipi? tutarudi pale tulpoishia," alisema Kasongo
Yanga ina wachezaji wawili Stephane Aziz Ki na Djigui Diarra ambao bado wamebaki Ivory Coast baada ya Burkina Faso na Mali kutinga hatua ya 16 bora
Timu hizo zitachuana Januari 30 ambapo maana yake ni kuwa baada ya mchezo huo, mchezaji mmoja ataendelea hatua inayofuata huku mmoja akirejea Tanzania kuendelea na mikiki mikiki ya Ligi Kuu
