Baada ya mapumziko ya zaidi ya mwezi mmoja, ligi kuu ya NBC inarejea leo ambapo mabingwa wa ligi hiyo Yanga ni miongoni mwa timu zitakazoshuka dimbani
Yanga iko mkoani Kagera kuchuana na Kagera Sugar katika mchezo utakaopigwa uwanja wa Kaitaba, muda wa mchezo ni saa 10 jioni
Kikosi cha Yanga kilitua Bukoba mapema jana na jioni vijana wa Miguel Gamondi wakafanya mazoezi yao ya mwisho katika dimba la Kaitaba
Mara nyingi mechi ya kwanza baada ya mapumziko ya muda mrefu huwa si nyepesi kwa kuwa wachezaji ndio wanarudi mchezoni
Gamondi amesema timu yake itaingia na mfumo wake wa siku zote na lengo ni kupata ushindi
Yanga ilipata mapokezi makubwa jana na bila shaka dimba la Kaitaba litapambwa kwa rangi za njano, kijani na nyeusi licha ya Yanga kuwa ugenini
Ushindi kwa Yanga utawarudisha kileleni mwa msimamo wa ligi na pengine huo utakuwa mwanzo wa safari ya kutetea ubingwa kwa msimu wa tatu mfululizo
Katika mchezo huo Yanga itakosa huduma ya nahodha Bakari Mwamnyeto na Ibrahim Bacca ambao wamerejea kutoka Ivory Coast wakiwa majeruhi
Winga Augustine Okrah pia bado hajaimarika sawasawa kutokana na majeraha aliyopata katika michuano ya kombe la Mapinduzi
Djigui Diarra bado yuko Ivory Coast akisubiri robo fainali Afcon 2023 wakati Stephane Aziz Ki akitarajiwa kurejea nchini baada ya Burkina Faso kuondoshwa Afcon
