Wakati Yanga inapigwa mabao 2-1 na Ihefu Fc, kulikuwa na matukio mengi ya kupoteza muda kutoka kwa wenyeji
Unaweza kusema kwa wastani mchezo ule ulipigwa dakika 60 tu, hata muda wa nyongeza haukuchezwa ipasavyo kwani matukio hayo yaliendelea
Mkoani Kagera mbinu hizo zikajirudia kwa Kagera Sugar na wakafanikiwa kupata alama moja
Jana katika mchezo dhidi ya Dodoma Jiji Yanga ikalazimika kusubiri mpaka dakika ya 86 kufunga bao pekee la ushindi katika mchezo ambao muda mwingi ulipotea kwa wachezaji wa Dodoma Jiji kufanya matukio yaleyale
Ujumbe ambao Kocha Mkuu wa Yanga Miguel Gamondi anahitaji kuondoka nao ni kuwa atarajie kila mechi wapinzani wake watatumia mbinu hiyo kwani wanaona ndio njia pekee ya kuizuia Yanga
Lakini mbinu hii haitafanya kazi kama Yanga itakuwa ikifunga mapema. Mkakati ni kuhakikisha vijana wake wanapachika mabao ya mapema ili kuvuruga mipango ya wapinzani
Zile tano tano walizopigwa baadhi ya timu zilitokea baada ya kuwa Yanga imetangulia kufunga mapema na katika mechi ambazo huchelewa kufunga, mambo huwa magumu kadiri mechi inavyoelekea ukingoni kwa sababu matukio ya kupoteza muda huongezeka
Upande wa Bodi ya Ligi na Kamati ya Waamuzi nao wanapaswa kuja na mkakati wa kukomesha mbinu hizi zinazowanyima mashabiki burudani ya soka
Mashabiki wanalipa viingilio kutazama burudani na sio kushuhudia wachezaji wakijiangusha kila mara kama wagonjwa
Waamuzi ni lazima waongeze ukali kwa kutoa adhabu na hata muda unaoongezwa baada ya dakika 90 lazima uakisi muda uliopotea
Haiwezekani mechi iliyopotezwa dakika 15 kuongeza dakika 5 tu na pengine katika hizo dakika za nyongeza zikachezwa mbili tu
